《享受工作快樂的伯伯》
知唔知咩叫「年初四咁嘅樣」？簡單講，即係要返工，要重投工作地獄嘅頹樣，黃子華都話，講得出「我好鍾意返工」嘅人，一定係鬼上身。
但我今日，真係見到個，你望到佢都覺得佢鍾意返工嘅人，一個年過七旬嘅裝窗簾伯伯。
係未見到佢之前，我老婆已經同我講，裝窗簾個伯伯上次度尺時好有禮貌，今日佢一到，我打開門佢就一臉笑容，唔係連鎖快餐店嘅歡迎光臨式笑容，而係一種和藹可親嘅笑容，當我提提佢除鞋入屋時，佢已經除緊：「我見你對鞋都係門口都估到要除喇。」
然後佢問我借椅企高去鑽孔：「唔好意思啊，阿媽生矮咗幾寸，要搵野企高少少先裝到。」
一邊睇佢裝，一邊我問佢貴庚，佢話74歲喇，正當我想問佢點解仲唔退休時，我都係無問到，反而問佢裝窗簾裝咗幾多年，佢話十年左右啦，數一數，即係佢64歲先開始裝，原來佢之前係做工程，但年紀大做唔到太粗重工作，所以轉咗做窗簾。
佢手腳好快，十五分鐘就搞掂，仲幫我輕輕抹咗地下嘅塵，臨走之時，我一直打開門等佢著好鞋，佢著完之後同我講，大家身體健康啊，然後就拎咗消毒酒精出嚟噴，印象中佢入門都有噴到，最後同佢揮手道別。
屋企裝修，所以呢排見好多師傅同送貨，普遍我覺得，年紀愈大愈有禮貌同有講有笑，反而後生嘅做完就走，大家各行各路，有時仲唔問聲就一腳踩入屋。
望望鏡入面嘅自己，我覺得自己工作嘅時候一定無伯伯咁開心，到底我同佢有咩唔同？
或者我係為錢而工作，而伯伯佢心態係，今時今日仲可以工作，已經好感恩，對於肯搵佢做野嘅人，佢都心存感激，而老闆肯繼續搵佢幫手，可能都係呢種熱誠打動到佢。
自己又好，身邊人都好，有幾多個會開開心心返工，大家都係為生活，為錢而工作，最終目標係為咗唔工作而工作，但見到伯伯我會諗，退休嘅年紀，仲有能力工作搵錢，每日去唔同地方行下走下，比起係屋企退休唔知做乜，伯伯開心係正常嘅。
如果好鍾意返工，係鬼上身，咁鬼上身都唔錯，起碼唔駛成日年初四咁嘅樣。
享受工作快樂，到底係唔係老人家嘅專利，如果年齡唔係條件的話，咁我哋欠缺嘅，又係咩呢？
－－－－－－－－－－－－－－－－－－－－－
有興趣購買《弊傢伙，我女朋友有咗》的朋友，可以經以下連結購買：
Payme, FPS, Alipay連結：https://forms.gle/UEdH32PfVD2cp5nK6
掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search